afrika-dig
Lara Kirsten
ek wil ’n gedig skryf wat soos afrika ruik
wat soos die heuwels van afrika
onder my voete pols
’n gedig wat soos afrika jou laat voel
dat jy tuis gekom het
’n gedig wat afrika-vas is op my tong
wat gloei soos die afrika-son op my rug
my tong is warm afrika-klip waarop die son vurig pyl
en die sonbesies teen die boombas van my keel sing
sing sing sing
die afrika lug en doringbome en krieke
en woestyn-stilte
sing sing sing
afrika uit die woude van my afrika-tong
my gedig wil soos aalwyne die lug steek
met bloedklanke die ondergaan van my sonswoord
tot stilte en vrede roep
my woorde wil jou roep soos die skaars watergate
in die dorre landskap en die klanke wil dorstig
opgelek word deur die tonge van skugter koedoes
met hierdie gedig wil ek nie sin maak met woord
ek wil my tong soos ’n rotsblok laat tuimel
met die steil kranse af
en met die val wil
ek leer om weer aarde-taal te praat
afrika-aarde taal
From: McGregor Poetry Festival 2014 Anthology
First published in 2015 by African Sun Press
in association with The McGregor Poetry Festival Committee
ISBN 978-0-620-64600-0
The Poet:
Lara Kirsten is a pianist and performance poet. She holds a BMus (Honours) from the University of Pretoria. As a solo pianist and accompanist for singers and instrumentalists,
she performs all over South Africa. As a poet, she has performed in the Netherlands and at many venues in South Africa. She belongs to the Eastern Cape poetry group, Ecca, and has recorded a CD of her own poetry.
Sources of previously published poems:
afrika-dig from Spaces, Ecca Poets, Hogsback 2009, ISBN 978-0-620-44997-7.
